2010/07/31

عيد جوازى


بالصدفه ببص فى النتيجه النهارده بشوف النهارده ايه فى ايام ربنا لقيت 31/7

استغربت اوى

اقولكم بقى استغربت ليه

لان المفروض ان عيد جوازى الرابع كان امبارح

المفروض حتى انى كنت افتكر المناسبه دى انا وجوزى

ونسترجع زكرياتنا ف اليوم ده

غمضت عينى لمدة خمس دقايق وانا بنيم بنتى ع السرير

وافتكرت يوم فرحى

اد ايه كنت فرحانه وقلقانه ومرتبكه

كل قريبنا كانوا عندنا ف البيت

والمفروض كنت هروح الكوفير العصر

بس رغده صحبتى اصرت انى اروح الجم واعمل حمام بخار

وبعدين روحت تانى البيت على الساعه 2 كده خدت شور واتغديت

وحضرت فستانى وطرحتى واستعديت انى انزل اروح الكوفير

وطبعا كان اخواتى واصحابى معايا كنت متضايقه اوى

انى هسيب ماما واخواتى وهتنقل بيت جديد

كنت ببص لكل شبر ف البيت اكنى معتش هدخل البيت دا تانى

مسكت نفسى عشان معيطش ورسمت ابتسامه على وشى

عشان معملش زى عرايس كتير بتيجى خارجه من بيت اهلها

يوم فرحها تعد تعيط واللى حوليها يعيطوا

بصيت لمامتى وهيا وقفالى على باب شقتنا تودعنى

لقيت على نفسها نفس الابتسامه ابتسامه على وشها بس

وعنيها مليانه دموع كنت حاسه باللى ف قلبها

وعارفه انها ماسكه نفسها بالعافيه وكأن حاجه منها بتقتلع منها

المهم حاولت انى اطلع من المود ده

والى حد ما كنت عروسه مقبوله يعنى مش وحشه(تمشى)

كنت فرحانه بالحياه الجديده اللى انا هعيشها

وطبعا كنت موعوده بوعود جميله تلات اربعها متحققش

بيبقى اسمه كلام خطوبه واول ميتقفل على الزوج والزوجه

باب واحد الوعود بتروح مع المعزيم

وف اخر الكلام بهدى الاغنيه دى لكل البنات

متفكروش يابنات ان الجواز راحه

ومتزعلوش يابنات ان قلنا بصراحه

ان الجواز الجواز عمره ماكان راحه


انا ايه خلانى اساسا ابص ف النيجه

ماهى ايام وبنعشها

هناك 8 تعليقات:

موناليزا يقول...

كل سنة وانتى طيبة
وكل مرحلة وليها جمالها
استمتعى بحياتك وببنوتك الجميلة
وربنا يباركلك فى حياتك

جايدا العزيزي يقول...

كل سنه وانت طيبه يا قمر

بس بالذمه دى مناسبه تتنسى ازاى يعنى


هو الجواز عمرة ماكان راحه


بس مقدر ومكتوب


انا عيد جوازى العشرين قرب وبفتكرة كل سنه


باين عليكى نسايه

اوعى تنسى عيد ميلا بنتك اوعى


كدة ازعل منك


انما عيد جوازك سماح


لان لا العازب مرتاح ولا المتجوز مرتاح

ضفت نفس عندك


وكل يوم من ده لغايه ما تفتكرى

وتبطلى اكل الفول هو ده السبب


تحياتى

blue-wave يقول...

كل سنه وانتى طيبه
وكويس انك عارفه ان الجواز مش راحه:))

ابتسامة حزن يقول...

موناليزا
وانتى طيبه ياعسل
يارب حياتك انتى كمان تكون كلها سعاده

*************************
جايدا العزيزي
وانتى طيبه وبخير دايما يارب
وعقبال ما تفتكرى عيد ميلادك رقم ميه وانتى بصحه وسعاده

على فكره انا مش نسايه ووالله كمان مش بحب الفول
واعياد ميلاد ولادى بستناها باليوم
بس تقدرى تقولى ان عيد جوازى مش مناسبه سعيده بالنسبالى عشان كده تناسيت مش نسيت


*****************************

blue-wave
وانت طيب يادكتور
اه شفت بقى اكتشفت مؤخرا ان الجواز مش راحه بس خدت من الجواز اكتر حاجه حلوه فى حياتى وهما ولادى

***************************

حـــــروف متــبعترة " عــمرو الشــايب يقول...

حلو ان الواحد يفتكر يوم حلو ف حياته و يا سلام لو نساها بسبب العيال و البمبرز صدقيني احنا كدة يا رجاله اول لما بنحس ان المسؤلية تقلت اوى بننسى اهم حاجة ف حياتنا معلش اعذريه بقى ابو البنات و بيفكر يعمل كل حاجة و المهم انك افتكرتي معلش بس صدقيني لو احتفلتوا بيه هيبقى احسن و مش تضيعي فرحتك صدقيني ممكن يكون نسى ما عشان كدة عاوز اعمل خطوبتي و فرحي يوم ميلادي اكون ارتحت اكده اكده هفتكر ههههههههههههههههههههههههه

ابتسامة حزن يقول...

عمرو
ابقي قابلني لو افتكرت ساعتها انت مولود امتي اساسا
ههههههه

أتنين حبيبين يقول...

الحمد لله على كل حال
ودوام الحال من المحال
ربنا يخليلك بناتك هما اجمل هديه من ربك

حـــلـــم كـــان يقول...

يعجبنى فيكى نصايحك

كل سنه وانت طيبه يارب